কঁপনি

কঁপনি!

-দ্বীপজ্যোতি মেধি

(১)

নদীয়ে সাগৰক ভেঙুচালি কৰা বতৰতে
বৰষুণজাকে মহতিয়াই নিলে এজনী ৰূপহী,

মল্লযুঁজত পৰ্বতৰ হাতত পাহাৰ হাৰিল,
জোনৰ মাজত থাকি গ'ল তিনিটা শিল ।

(২)
যন্ত্ৰণাই কোঙা কৰিলে আৱেগ জিকে
পাহাৰৰ সিপাৰে তেজাল বেলি শুই পৰে,

কান্দোনে বিবেকৰ চুলি চিঙে,
সিহঁতৰ চুলিয়াচুলিত
মৰম আকলুৱা পখীজনী মূর্ছা যায়,

মুখ ঢাকি উচুপি উঠে
তিলক তাল কৰা দৰ্শক ।

(৩)
পগলা অতীতৰ উখহা গালতে
শালমইনাৰ ৰাসলীলা চলে,

সাপৰ পেটত নেউল হজম হৈ যায়
চুটি হৈ আহে অঁকৰা জোনাকৰ উশাহ,

ধাৰত পোত গৈ মৰে বহাগৰ উলাহ ।

(৪)
তিনিপাহ শেৱালি ফুলা পলত
মিঠাতেলৰ ভৰষাত ফোঁপাই আছে এটা চাকি,

তাক ভালপোৱাৰ ধূপ এগছি লাগে
আৰু এমুঠি ফাকু ।

---------------------------------------------------